Անցանկալի հղիություն. կոնտրացեպցիա

Ընտանիքի պլանավորման հարցն անհանգստացնում է բոլորին անխտիր։ Իսկ դա նշանակում է, որ վաղ թե ուշ մեր առջև կկանգնի հակաբեղմնավորիչ միջոցների ընտրության խնդիրը։ Բայց ինչպես հայտնի է, հղիությունից պաշտպանվելու միակ բացարձակ ապահով միջոցը ինտիմ կյանքից լիովին հրաժարվելն է։ Եվ այնուհանդերձ, նրանք, ովքեր պատրաստ չեն  նման «զոհաբերության», ստիպված են գոյություն ունեցող հակաբեղմնավորիչների բազմազանությունից ընտրել իրենց համար առավել ընդունելի տարբերակը։ Եվ այսպես՝ կոնտրացեպցիա նշանակում է հղիության կանխարգելում։

Բոլորին է հայտնի, որ միայն առողջ մայրը կարող է լույս աշխարհ բերել առողջ երեխա, և միայն առողջ երեխան հետագայում կարող է դառնալ առողջ մայր։ Ձեզ զարմացնում է՝ ի՞նչ կապ կարող է լինել առողջության և կոնտրացեպցիայի միջև։ Փորձեմ պարզաբանել. վերջին տարիների հետազոտությունները ցույց են տվել, որ գոյություն ունի սերտ փոխկապակցվածություն կնոջ առողջական ընդհանուր վիճակի և վերարտադրողական ֆունկցիայի միջև։ Հետևաբար, պետք է հոգ տանել և թույլ չտալ որևէ «խափանում» այս համակարգում։

Մենք արդեն խոսել ենք աբորտների կործանարար ազդեցության մասին, որոնք հետագայում կարող են հանգեցնել անպտղության, վիժումների, վաղաժամ և բարդ ծննդաբերության, քրոնիկ բորբոքային պրոցեսների և այլն։ Բացի այդ, ներկայումս առանձնացնում ենք «բարձր ռիսկի» կանանց խմբեր, որոնց հղիանալը ոչ բարերար ազդեցություն է ունենում իրենց իսկ առողջական վիճակի վրա։

Փաստ է, որ հղիությունն անցանկալի է մինչև քսան տարեկան և քառասուն տարեկանից բարձր կանանց շրջանում։ Ծննդաբերությունների քանակի աելացման հետ մեկտեղ (չորս և ավելի հանգամանքներ) մեծանում է կնոջ՝ դիաբետով հիվանդանալու հավանականությունը, ինչպես նաև արյունահոսությունների հաճախականությունը։ Երկու-երկուսուկես տարուց ավելի փոքր ընդմիջումով ծննդաբերությունները ևս բացասաբար են ազդում կնոջ առողջական վիճակի վրա։ Զանազան սոմատիկ հիվանդությունների առկայությունը նույնպես բարդացնում է  հղիության և ծննդաբերության ընթացքը՝ վատթարացնելով  մոր և դեռ չծնված երեխայի առողջությունը։ (Հղիությունը կանխելուց բացի, հորմոնալ հակաբեղմնավորիչները կիրառվում են նաև «հորմոնալ» անպտղության և ուրիշ տարբեր հորմոնալ խանգարումների՝ ներառյալ կլիմակտերիկ համախտանիշի դեպքերում)։

Վերը շարադրվածը հանգեցնում է նրան, որ ներկայումս հակաբեղմնավորիչների կիրառման շրջանակները զգալիորեն մեծացել են։ Կնոջ օրգանիզմի տարիքային յուրահատկությունները կարևոր դեր են խաղում ապահով, անվտանգ հակաբեղմնավորիչների ընտրության հարցում ոչ միայն անցանկալի հղիությունից, այլև կանացի օրգանիզմի մի շարք հիվանդություններից (և առաջին հերթին վերարտադրողական համակարգի) պաշտպանվելու համար։
Ճիշտ կլինի հակաբեղմնավորիչ ընտրելիս խորհրդակցել բժշկի հետ։

Մանկաբարձ-գինեկոլոգ
Նանա Դանիելբեկ

Հարցեր, պատասխաններ, մեկնաբանություններ